Kuelekea mchezo wa pili wa hatua ya makundi ya ligi mabingwa wa ulaya kati ya Porto dhidi ya Chelsea, katika dimba la Estadio de Dragao, mahasimu wawili watakutana kwa mara nyingine tena.
Kwa kocha wa Chelsea Jose Mourinho na golikipa wa Porto Iker Casillas itakuwa zaidi ya mechi. Wawili hawa walikuwa mtu na kocha wake katika klabu ya Real Madrid, lakini uhusiano wao uliharibika kabisa wakati wote wakiwa Santiago Bernabeu.
Kilichoharibu uhusiano wa Mourinho na Casillas ulikuwa ni uhasama wa timu za Barcelona na Real Madrid, ambao mechi zao za El Clasico zinaelezewa zilijaa uhasama mkubwa hasa kipindi Special One akiwa kocha wa Madrid, mechi zilijawa na ugomvi na udanganyifu kwa waamuzi.
Staili hii ya mchezo ilikuwa inampendeza Mourinho, katika kuutafuta ushindi dhidi ya Barca iliyokuwa katika ubora wake.
Lakini Casillas, akiwa nahodha wa klabu yake na pia timu ya taifa, aliangalia kwenye picha kubwa na kuona hatari ya uhasama wa kwenye vilabu unaweza kuiathiri mpaka timu ya taifa.
Xavi hivi karibuni aliliambia gazeti la marca namna Casillas alivyompigia simu kuzungumza nae juu ya maslahi ya timu ya taifa: “Iker anastahili pongezi nyingi. Alinipigia me na Carles Puyol. Tuliongea kuhusu kuangalia maslahi ya timu yetu ya taifa yanavyoweza kuathiriwa na uhasama vilabuni.”
Jambo hili lilionekana kama ni usaliti katika macho ya Jose Mourinho. Casillas alienda kuongea na maadui, mwisho wa siku akapoteza imani yake kwa Mourinho, na ukawa mwisho wa utawala wa himaya ya ‘mtakatifu Iker’ ndani ya Santiago Bernabeu.
Uhasama huo baina ya wawili hao ulichangia kukuza matatizo yaliyomuondoa Mourinho Madrid, na hata baada ya muda bado wawili hawa wameendelea kutupiana maneno – hivi karibuni wakati Casillas amejiunga na Porto – timu iliyowahi kufundishwa na Mourinho pia, mreno huyo hakuweza kukaa kimya, akaibuka na kusema mishahara ya Porto imemvutia Casillas kwenda Ureno.
Mchezo wa kesho utawakutanisha wawili hao baada ya muda mrefu, lakini pia itakuwa siku nyingine ya Casillas kuandika historia mpya ya kuwa mchezaji aliyecheza mechi zaidi ya katika historia ya Champions League – atatimiza mechi 151.
No comments:
Post a Comment